புதுடெல்லி,

உலக பேட்மிண்டன் வீரர்களின் புதிய தரவரிசை பட்டியலை சர்வதேச பேட்மிண்டன் சம்மேளனம் நேற்று வெளியிட்டது. இதன்படி ஆண்கள் இரட்டையர் பிரிவில் இந்தியாவின் சாத்விக் சாய்ராஜ் ரங்கி ரெட்டி-சிராக் ஷெட்டி இணை 3 இடங்கள் முன்னேறி 10-வது இடத்தை பிடித்துள்ளது. முன்னாள் நம்பர் ஒன் ஜோடியான சாத்விக்-சிராஜ், சீன ஓபன் போட்டியில் அரைஇறுதிக்குள் நுழைந்ததால் இந்த ஏற்றம் கண்டுள்ளது.

ஆண்கள் ஒற்றையர் பிரிவில் இந்திய வீரர்கள் லக்ஷயா சென் 2 இடம் அதிகரித்து 17-வது இடத்தையும், எச்.எஸ்.பிரனாய் இரு இடம் முன்னேறி 33-வது இடத்தையும் பெற்றுள்ளனர். பெண்கள் ஒற்றையர் பிரிவில் இந்திய நட்சத்திர வீராங்கனை பி.வி.சிந்து 15-வது இடத்தில் தொடருகிறார். சீன ஓபனின் 2-வது சுற்றில் சிந்துவுக்கு அதிர்ச்சி அளித்த அரியானாவை சேர்ந்த 17 வயது உன்னதி ஹூடா 3 இடங்கள் ஏறி தனது சிறந்த தரநிலையாக 31-வது இடத்தை பிடித்துள்ளார்.