சமர்கண்ட்,

‘பிடே’ கிராண்ட் சுவிஸ் செஸ் போட்டி உஸ்பெகிஸ்தானில் உள்ள சமர்கண்ட் நகரில் நடந்து வருகிறது. 11 சுற்றுகள் கொண்ட இந்த போட்டி தொடர் ஓபன் மற்றும் பெண்கள் என இரு பிரிவில் நடத்தப்படுகிறது. இதில் ஒவ்வொரு பிரிவிலும் டாப்-2 இடத்தை பிடிக்கும் வீரர், வீராங்கனைகள் அடுத்த ஆண்டு நடக்கும் கேண்டிடேட்ஸ் செஸ் போட்டிக்கு தகுதி பெறுவார்கள்.

இதில் ஓபன் பிரிவு 2-வது சுற்று ஆட்டம் ஒன்றில் தமிழகத்தை சேர்ந்த பிரக்ஞானந்தா, ரஷியாவின் இவான் ஜெம்லியான்ஸ்கியை சந்தித்தார். வெள்ளைநிற காய்களுடன் ஆடிய பிரக்ஞானந்தா 33-வது நகர்த்தலில் ஜெம்லியான்ஸ்கியை சாய்த்து முதல் வெற்றியை பெற்றார். அவர் முதல் சுற்றில் டிரா கண்டிருந்தார்.

இதன் பெண்கள் பிரிவில் 2-வது சுற்றில் கருப்புநிற காய்களுடன் ஆடிய தமிழக வீராங்கனை ஆர்.வைஷாலி 22-வது நகர்த்தலில் நெதர்லாந்தின் எலினி ரோபர்சை எளிதில் தோற்கடித்து 2-வது வெற்றியை பதிவு செய்தார்.