டெஹ்ரான்,

காஷ்மீரின் பஹல்காம் பகுதியில் கடந்த ஏப்ரல் 22-ந்தேதி பயங்கரவாதிகள் நடத்திய கொடூர தாக்குதலில் 26 பேர் கொல்லப்பட்டனர். இந்த தாக்குதலுக்கு பதிலடியாக இந்திய ராணுவம் 'ஆபரேஷன் சிந்தூர்' என்ற பெயரில் பதிலடி தாக்குதல் நடத்தியது.

இந்த தாக்குதலில் பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் செயல்பட்டு வந்த 9 பயங்கரவாத முகாம்கள் அழிக்கப்பட்டதாக இந்திய ராணுவம் தெரிவித்தது. இந்த தாக்குதலை தொடர்ந்து இந்தியா-பாகிஸ்தான் இடையே போர் பதற்றம் உருவாகியுள்ளது.

இந்நிலையில் இந்தியா-பாகிஸ்தான் இடையே போர் ஏற்பட்டால் அதனால் யாருக்கு லாபம் ஏற்படும்? யாருக்கு நஷ்டம் ஏற்படும்? என 'எக்ஸ்' வலைதளத்தில் ஈரான் ராணுவம் பதிவு ஒன்றை வெளியிட்டுள்ளது. அந்த பதிவில் கூறப்பட்டுள்ளதாவது;-

"பாகிஸ்தான்-இந்தியா போரால் யாருக்கு லாபம்? யாருக்கு நஷ்டம்? என்ன நடக்கும்?

வெற்றியாளர்கள்:

1- அமெரிக்கா

* இரு தரப்பினருக்கும் ஆயுதங்களை விற்பனை செய்வார்கள் (பாகிஸ்தானின் ஆயுதங்களில் 40% அமெரிக்காவில் இருந்து வருகிறது)

* பாகிஸ்தானை நிலைகுலைய செய்வதன் மூலம் சீனாவை பலவீனப்படுத்துவார்கள்.

2- இஸ்ரேல்

* இந்தியாவிற்கு டிரோன் விற்பனை செய்வார்கள் (Hermes 900)

* காசா போர்க்குற்றங்களை திசை திருப்புவார்கள்.

* ஏவுகணை கூட்டு உற்பத்தியில் லாபம் கிடைக்கும் (Barak-8)

* பாதுகாப்பிற்காக இந்தியாவின் ஐ.நா. வாக்குகளைப் பயன்படுத்தும்.

* ஏவுகணை பாதுகாப்பு அமைப்புகளை (Arrow-3) இந்தியாவிற்கு விற்பனை செய்யும்.

3- பயங்கரவாத குழுக்கள்

* ஐ.எஸ்.ஐ.எஸ்., அல்-கொய்தா உள்ளிட்ட அமைப்புகள் காஷ்மீரில் ஆட்சேர்ப்பு நடத்தும்.

4- ஆயுத தொழில் துறை

* லாக்ஹீட் மார்ட்டின் மற்றும் பிறர் ஆயுத ஒப்பந்தங்களில் இருந்து லாபம் பெறுவார்கள்

தோல்வியடைபவர்கள்:

1. பொதுமக்கள்:

* நிரந்தரமாக பாதிக்கப்படுவார்கள்

* உயிரிழப்பவர்களில் 75% பேர் போராளிகள் அல்லாதவர்களாக இருப்பார்கள்.

* விநியோக சங்கிலி சரிவால் 140 மில்லியன் பேர் பஞ்சத்தை எதிர்கொள்வார்கள்.

* 20 மில்லியனுக்கும் அதிகமானோர் அகதிகள் ஆவார்கள்.

* காஷ்மீர் முகாம்கள் 4 மடங்காக நிரம்பி வழியும்.

2. தேசிய பொருளாதாரங்கள்:

* பாகிஸ்தான்: திவால்நிலைக்கு அருகில் செல்லும் (போருக்கு 77% வருவாய் செலவிடப்படும்)

* இந்தியா: 45% ரூபாய் சரிவு, $90 பில்லியன் தொழில்நுட்பத் துறை இழப்பு

3. சுற்றுச்சூழல் பேரழிவு

* யுரேனியம் விஷம் கலந்த நீர் (1999 போல்)

* காஷ்மீரின் 60% காடுகள் எரியும்

உண்மை நிலவரம்:

இந்தப் போரை ஆதரிக்கும் எந்த நாடும் அல்லது நடிகரும் இரு தரப்பினருக்கும் எதிரிதான். இந்தப் போர் மேற்கு நாடுகள் மற்றும் இஸ்ரேலுக்கு மட்டுமே உதவும். இது ஆயுத வியாபாரிகளை வளப்படுத்தவும், தெற்காசியாவை அழிக்கவும் உருவாக்கப்பட்ட நெருக்கடி ஆகும்."

இவ்வாறு அதில் தெரிவிக்கப்பட்டுள்ளது.