வாஷிங்டன்,

அமெரிக்க ஜனாதிபதியாக டொனால்டு டிரம்ப் கடந்த ஜனவரி மாதம் பதவியேற்றார். ஜனாதிபதியானது முதல் பல்வேறு அதிரடி நடவடிக்கைகளை டிரம்ப் மேற்கொண்டு வருகிறார். பல்வேறு நாடுகள் மீது இறக்குமதி வரியை அதிரடியாக உயர்த்தியுள்ளார்.

இதனிடையே, 3 ஆண்டுகளுக்குமேல் நீடித்து வரும் உக்ரைன் - ரஷியா போரை நிறுத்த டிரம்ப் முயற்சித்தார். ஆனால், முயற்சி தோல்வியடைந்ததால் ஆத்திரமடைந்த டிரம்ப், ரஷியா மீது பல்வேறு பொருளாதார தடைகளை விதித்துள்ளார். மேலும், 50 நாட்களுக்குள் உக்ரைன் மீதான தாக்குதலை நிறுத்தாவிட்டால் ரஷியா மீது கூடுதல் பொருளாதார தடைகள் விதிக்கப்படும் என்று அமெரிக்க ஜனாதிபதி டிரம்ப் மிரட்டல் விடுத்தார்.

மேலும், ரஷியாமிருந்து கச்சா எண்ணெய் உள்ளிட்ட வர்த்தகத்தில் ஈடுபடும் இந்தியா, சீனா உள்ளிட்ட நாடுகள் மீது டிரம்ப் கூடுதல் வரி விதிப்பையும் அறிவித்துள்ளார். மேலும், இந்தியாவும், ரஷியாவும் இறந்த பொருளாதாரங்கள் (Dead Economies) என்றும் கூறினார்.

இதனிடையே, டிரம்ப்பின் கருத்துக்கு ரஷிய முன்னாள் அதிபரும், (2008 முதல் 2012 வரை) ரஷிய பாதுகாப்பு கவுன்சில் துணைத்தலைவருமான டிமிட்ரி மெட்வதேவ் பதிலடி கொடுத்திருந்தார்.

இது தொடர்பாக சமூகவலைதள பக்கத்தில் டிமிட்ரி வெளியிட்ட பதிவில், ரஷியா ஒன்றும் இஸ்ரேலோ, ஈரானோ அல்ல. ஒவ்வொரு காலக்கெடுவும் மிரட்டல், போருக்கான பாதை.

இந்தியா, ரஷியாவின் இறந்த பொருளாதாரங்கள் குறித்த டிரம்ப்பின் பேச்சால் அவர் ஆபத்தான எல்லைக்குள் நுழைகிறார். அவர் தனது மிகவும் பிடித்த 'தி வாக்கிங் டெட்' இறந்த நடை திரைப்படம் குறித்து பேசுகிறார் என்று நினைக்கிறேன். ஆனால், அவர் இல்லாத இறந்த கைகள் (dead hand) எவ்வளவு ஆபத்தானது பற்றியும் நினைவில் கொள்ள வேண்டும்' என தெரிவித்தார்.

இறந்த கைகள் (dead hand) என்பது ரஷியா - அமெரிக்கா பனிப்போரின்போது ரஷியாவால் அமைக்கப்பட்ட அணு ஆயுத தாக்குதல் கட்டமைப்பாகும். இந்த கட்டமைப்பு, ரஷியா மீது அமெரிக்கா அணு ஆயுத தாக்குதல் நடத்தி ரஷியாவின் தலைவர்கள் உயிரிழந்தபோதும், அணு ஆயுத கட்டளைகளை அளிக்காதபோதும், தன்னிச்சையாக ரஷியாவின் ஒட்டுமொத்த அணு ஆயுதங்களையும் அமெரிக்காவை நோக்கி ஏவும் வகையில் அமைக்கப்பட்டுள்ளது. பனிப்போர் காலத்தில் அமைக்கப்பட்ட இந்த அணு ஆயுத கட்டமைப்பு தற்போதும் செயல்பாட்டில் உள்ளது.

இந்நிலையில், ரஷிய முன்னாள் அதிபர் டிமிட்ரியின் மிரட்டலை தொடர்ந்து ரஷியா நோக்கி அணு ஆயுதம் தாங்கிய 2 நீர்மூழ்கி கப்பல்களை அனுப்பி டிரம்ப் அதிரடி உத்தரவு பிறப்பித்துள்ளார்.

இது தொடர்பாக டிரம்ப் தனது சமூகவலைதள பக்கத்தில் வெளியிட்ட பதிவில், ரஷிய முன்னாள் அதிபர் டிமிட்ரி மெட்வதேவின் முட்டாள்தனமான , ஆத்திரமூட்டும் மிரட்டல்கள் வெறொரும் மிரட்டல்களாக மட்டும் இல்லையென்றால் அதற்கு பதிலடியாக அணு ஆயுதம் தாங்கிய 2 நீர்மூழ்கி கப்பல்களை ரஷியா நோக்கி நிலைநிறுத்த உத்தரவிட்டுள்ளேன். வார்த்தைகள் மிகவும் முக்கியம். அந்த வார்த்தைகள் சில சமயங்களில் காரணமற்ற விளைவுகளை ஏற்படுத்தலாம். டிமிட்ரியின் தற்போதைய வார்த்தைகள் அதுபோன்ற விளைவுகளை ஏற்படுத்ததாது என நம்புகிறேன்

இவ்வாறு பதிவிட்டுள்ளார்.

இதனை தொடர்ந்து ரஷியாவை நோக்கி நிலைநிறுத்த அணு ஆயுதம் தாங்கிய 2 அமெரிக்க நீர்மூழ்கி கப்பல்கள் புறப்பட்டுள்ளன. அதேவேளை, டொனால்டு டிரம்பின் அணு ஆயுதம் தாங்கிய நீர்மூழ்கி கப்பல்கள் நிலைநிறுத்தல் தொடர்பான மிரட்டலுக்கு ரஷியாவும் பதிலடி கொடுத்துள்ளது. இது தொடர்பாக ரஷிய எம்.பி. விக்டர் வடலொட்ஸ்கெ கூறுகையில், உலக கடல்களில் அணு ஆயுதம் தாங்கிய அமெரிக்க நீர்மூழ்கி கப்பல்களை விட அணு ஆயுதம் தாங்கிய ரஷிய நீர்மூழ்கி கப்பல்கள் அதிகம். டொனால்டு டிரம்ப் உத்தரவிட்டு ரஷியா நோக்கி நிலைநிறுத்த உத்தரவிட்ட பகுதி அவரின் கட்டுப்பாட்டில் உள்ளது. அமெரிக்க ஜனாதிபதி உத்தரவிட்ட அணு ஆயுதம் தாங்கிய 2 நீர்மூழ்கி கப்பல்களும் எங்கு உள்ளன. அதன் செயல்பாடுகள் குறித்து எங்களுக்கு தெரியும். ஆகையால், டிரம்ப்பின் கருத்துக்கு ரஷியாவிடமிருந்து அணு ஆயுதம் தாங்கிய நீர்மூழ்கி கப்பல்கள் நிலைநிறுத்தல் ரீதியில் பதிலடி கொடுக்கும் அவசியமில்லை' என்றார்.