சென்னை,

தெற்கு ரயில்வேயின் ரெயில்வே பாதுகாப்புப் படையின் முதன்மை தலைமை பாதுகாப்பு ஆணையராகவும், இன்ஸ்பெக்டர் ஜெனரலாகவும், முதன்மை தலைமை பாதுகாப்பு ஆணையராகவும் கே.அருள் ஜோதி இன்று பதவியேற்றுள்ளார். முன்னதாக ஜூலை 31-ந்தேதி(நேற்று) ஜி.எம்.ஈஸ்வர ராவ் பணி ஓய்வு பெற்றதை தொடர்ந்து, கே.அருள் ஜோதி இன்று பதவியேற்றுள்ளார்.

கடந்த 1995-ம் ஆண்டு இந்திய ரெயில்வே பாதுகாப்புப் படை (IRPFS) பிரிவின் அதிகாரியாக பணியில் சேர்ந்த கே.அருள் ஜோதி, வடக்கு எல்லைப்புற ரெயில்வே, ஒருங்கிணைந்த ரெயில் பெட்டி தொழிற்சாலை/சென்னை, கிழக்கு ரெயில்வே, கிழக்கு மத்திய ரெயில்வே மற்றும் பிற மண்டலங்களில் ரெயில்வே பாதுகாப்புப் படையில் பல்வேறு பதவிகளில் பணியாற்றியுள்ளார்.

குறிப்பாக, 2019-2020 கொரோனா காலகட்டத்தில் தெற்கு ரெயில்வேயின் டி.ஐ.ஜி.யாக பணியாற்றிய இவர், 503 ஷ்ராமிக் சிறப்பு ரெயில்கள் மூலம் நாட்டின் பல்வேறு பகுதிகளுக்கு புலம்பெயர்ந்த தொழிலாளர்களின் பாதுகாப்பான பயணத்தை உறுதி செய்யும் பணியில் ஆர்.பி.எப். குழுக்களுக்கு தலைமை தாங்கினார் என்பது குறிப்பிடத்தக்கது.