திருச்சி,

திருச்சி ரெயில்வே கோட்டத்தில் பராமரிப்பு பணிகள் நடைபெறுவதால் திருச்சி வழியாக செல்லும் ரெயில் சேவையில் மாற்றம் செய்யப்பட்டுள்ளது. அதன் விபரம்;

* திருச்சி ரெயில் நிலையத்தில் இருந்து காலை 8.35 மணிக்கு புறப்படும் திருச்சி - காரைக்கால் டெமு ரெயில் (76820) வருகிற 4-ந்தேதி முதல் 10-ந்தேதி வரை திருச்சியில் இருந்து திருவாரூர் வரை மட்டும் இயங்கும்.

* ஈரோட்டில் இருந்து காலை 8.10 மணிக்கு புறப்படும் ஈரோடு - திருச்சி பயணிகள் ரெயில் (56106) வருகிற 5, 9-ந்தேதிகளில் ஈரோட்டில் இருந்து திருச்சி கோட்டை ரெயில் நிலையம் வரை மட்டும் இயங்கும்.

* காரைக்குடியில் இருந்து காலை 9.40 மணிக்கு புறப்படும் காரைக்குடி - திருச்சி பயணிகள் ரெயில் (56832) 5-ந்தேதி மற்றும் 19-ந்தேதி ஆகிய 2 நாட்கள் காரைக்குடியில் இருந்து குமாரமங்கலம் வரை மட்டும் இயங்கும்.

* காரைக்கால் - திருச்சி டெமு ரெயில் (76819) வருகிற 4-ந்தேதி முதல் 10-ந்தேதி வரை திருவாரூரில் இருந்து மாலை 4.15 மணிக்கு புறப்பட்டு திருச்சி வந்தடையும்.

* திருச்சி - பாலக்காடு டவுன் எக்ஸ்பிரஸ் ரெயில் (16843) வருகிற 5-ந்தேதி மற்றும் 19-ந்தேதி திருச்சி கோட்டை ரெயில் நிலையத்தில் இருந்து மதியம் 1.12 மணிக்கு புறப்பட்டு பாலக்காட்டுக்கு செல்லும்.

* திருச்சியில் இருந்து காலை 7.05 மணிக்கு புறப்படும் திருச்சி - ராமேசுவரம் எக்ஸ்பிரஸ் ரெயில் (16849) வருகிற 11-ந்தேதி முதல் 14-ந்தேதி வரை திருச்சியில் இருந்து மானாமதுரை வரை மட்டும் இயங்கும். மறுமார்கமாக வரும் ராமேசுவரத்தில் இருந்து மதியம் 3 மணிக்கு புறப்படும் ராமேசுவரம் - திருச்சி எக்ஸ்பிரஸ் ரெயில் (16850) வருகிற 11-ந்தேதி முதல் 14-ந்தேதி வரை ராமேசுவரம் - மானாமதுரை இடையே பகுதியாக ரத்து செய்யப்பட்டு மானாமதுரையில் இருந்து மாலை 4.55 மணிக்கு திருச்சிக்கு புறப்பட்டு செல்லும்.

மாற்றுப்பாதை

மயிலாடுதுறையில் இருந்து மதியம் 12.10 மணிக்கு புறப்படும் திருச்சி வழியாக செல்லும் மயிலாடுதுறை - செங்கோட்டை எக்ஸ்பிரஸ் ரெயில் வருகிற 10,13-ந்தேதிகளில் மணப்பாறை, வையம்பட்டி, வடமதுரை, திண்டுக்கல், கொடைக்கானல் ரோடு, மதுரை, திருப்பரங்குன்றம், திருமங்கலம், கல்லிக்குடி வழியாக இயங்காமல் மாற்றுப்பாதையில் திருச்சி, புதுக்கோட்டை, காரைக்குடி, தேவக்கோட்டை ரோடு, சிவகங்கை, மானாமதுரை, விருதுநகர் வழியாக செங்கோட்டைக்கு செல்லும்.