சர்க்கரை நோயாளிகள் ஐஸ்கிரீம் சாப்பிடலாமா?

ஐஸ்கிரீமை பிடிக்காதவர்கள் யாருமே இருக்க முடியாது. சர்க்கரை நோயாளிகளும் இதற்கு விதிவிலக்கு அல்ல. சர்க்கரை நோயாளிகள் ஐஸ்கிரீமை சாப்பிடவே கூடாது என்பதல்ல. அவர்கள் தங்கள் இரத்த சர்க்கரை கட்டுக்குள் இருக்கும் போது ஐஸ்கிரீமை எப்பொழுதாவது சாப்பிடலாம்.

ஒரு அரை கப் ஐஸ்கிரீமில் 137 கலோரிகள், 7 கிராம் கொழுப்பு, 16 கிராம் கார்போஹைட்ரேட், 14 கிராம் சுகர் இருக்கிறது. ஐஸ்கிரீமில் அதிகமான அளவு கார்போஹைட்ரேட், சுகர், கலோரி மற்றும் நிறைவுற்ற கொழுப்பு இருப்பதாலும், ஊட்டச் சத்துக்கள் குறைவாக இருப்பதாலும் சர்க்கரை நோயாளிகளுக்கு இது ஒரு சிறந்த உணவாக கருதப்படுவதில்லை. இருப்பினும் சர்க்கரை நோயாளிகள் ஐஸ்கிரீம் சாப்பிட வேண்டும் என்று ஆசைப்பட்டால் மூன்று வாரத்துக்கு ஒருமுறை, ஒரு அரை கப் ஐஸ்கிரீம் சாப்பிடலாம்.

சர்க்கரை நோயாளிகள் ஐஸ்கிரீம் சாப்பிடும் பொழுது கீழ்கண்டவற்றை பின்பற்ற வேண்டும்.

1) ஐஸ்கிரீம் சாப்பிடும்போது குறைந்த கார்போஹைட்ரேட், கலோரி, சுகர், கொழுப்பு மற்றும் அதிக புரதம் உள்ள ஐஸ்கிரீம்களை தேர்ந்தெடுக்க வேண்டும்.

2) ஐஸ்கிரீம் சாப்பிடும்போது உணவுக்கு பின் சாப்பிடுவது நல்லது. அப்படி சாப்பிடும்போது ஐஸ்கிரீமில் உள்ள அதிக கார்போஹைட்ரேட் அளவை பேலன்ஸ் செய்வதற்கு உணவில் அன்று உட்கொள்ளக்கூடிய கார்போஹைட்ரேட் அளவை குறைத்துக் கொள்ள வேண்டும்.

3) ஐஸ்கிரீமின் மேலே டாப்பிங்ஸாக பாதாம், பிஸ்தா போன்றவற்றை உபயோகிக்க வேண்டும். இது ஐஸ்கிரீம் சாப்பிட்ட உடனே ஏற்படும் சுகர் ஸ்பைக்ஸை தடுக்க உதவுகிறது.

4) அதிகமான அளவு ஐஸ்கிரீம் உட்கொள்ள கூடாது

5) ரத்த சர்க்கரை அதிகமாக இருக்கும்போது, அந்த சூழலில், ஐஸ்கிரீம் உண்ண முயற்சிக்க கூடாது. ரத்த சர்க்கரை அளவு கட்டுப்பாட்டில் உள்ள போதுதான் ஐஸ்கிரீம் சாப்பிடவேண்டும்.

மேலும், ஐஸ்க்ரீம் சாப்பிடும்போது, இதில் உள்ள டிரிப்டோபான் எனும் அமினோஆசிட் "பீல் குட்" ஹார்மோன் என்று அழைக்கப்படும் "செரட்டொனின்" சுரப்பதை அதிகப்படுத்துகிறது. இது மன அழுத்தத்தை குறைத்து உற்சாகமாக வைத்திருக்க உதவுவதாக ஆய்வுகளில் கண்டறியபட்டுள்ளது.