போக்சோ சட்டத்தில் மாமனாரை சிறைக்கு அனுப்ப முயற்சி: மருமகளின் கபட நாடகம் வெளியாகி அதிர்ச்சி

சென்னை ராயப்பேட்டை அனைத்து மகளிர் போலீஸ் நிலையத்தில் சமீபத்தில் இளம்பெண் ஒருவர் தனது மாமனார் மீது பரபரப்பு புகார் மனு ஒன்றை கொடுத்தார். தனது மகளான சிறுமியிடம் மாமனார் பாலியல் வன்கொடுமையில் ஈடுபட்டதாக அந்த புகாரில் தெரிவித்திருந்தார். இந்த புகார் மனு மீது போலீசார் போக்சோ சட்டப்பிரிவின் கீழ் வழக்குப்பதிவு செய்தனர்.

பின்னர் இதுபற்றி போலீசார் அதிரடி விசாரணை நடத்தினார்கள். புகார் கூறப்பட்ட மாமனாரும் போலீஸ் நிலையத்துக்கு அழைத்து வரப்பட்டார். அவரிடம் நடத்திய விசாரணையில் தன்மீதான குற்றசாட்டை மறுத்தார். மருமகள் தன் மீது பொய் புகார் கொடுத்து உள்ளதாக தெரிவித்தார்.

அடுத்தக்கட்டமாக போலீசார் சிறுமியை தனியாக அழைத்து விசாரணை நடத்தினார்கள். அப்போது தனது தாத்தா தன்னிடம் தவறாக நடக்கவில்லை என்றும், அம்மா கொடுத்த புகாரில் உண்மையில்லை என்றும், தெரிவித்தார். இதை கேட்டு போலீசார் அதிர்ச்சி அடைந்தனர்.

இதையொட்டி போலீசார் மீண்டும் இந்த வழக்கில் தீவிர விசாரணை நடத்தினார்கள். விசாரணையில் மாமனாரை சிறைக்கு அனுப்புவதற்காக மருமகள் பொய்யான புகாரை கொடுத்து கபட நாடகத்தை அரங்கேற்றி இருப்பது தெரியவந்தது.

புகார் கூறப்பட்ட மாமனார் வசதி படைத்தவர். அவருக்கு வீட்டு வாடகை மூலமே மாதம் ரூ.60 ஆயிரத்துக்கும் மேல் வருமானம் வருவதாக கூறப்படுகிறது. அவரது மகன் எம்.இ. பட்டதாரி. ஆனால் வேலைக்குப் போகாமல் வீட்டிலேயே இருந்து பொழுதை போக்கியதாக தெரிகிறது. இதனால் மகனை தந்தை அடிக்கடி திட்டிவந்துள்ளார்.

அவரை வழக்கில் சிக்கவைத்து சிறைக்கு அனுப்பிவிட்டால் நிம்மதியாக இருக்கலாம் என்று மகன் திட்டமிட்டு உள்ளார். அதற்கு தனது மகளான சிறுமியை பயன்படுத்தி பொய் புகார் கொடுக்க மகனின் தூண்டுதலின் பேரில் மருமகள் பொய் புகார் கொடுத்து நாடகமாடியது, போலீஸ் விசாரணையில் வெளிச்சத்துக்கு வந்தது.

பொய் புகார் கொடுத்த மருமகள் மீது சட்டப்பூர்வ நடவடிக்கை எடுக்க போலீசார் முடிவு செய்துள்ளனர். அதே போக்சோ சட்டப்பிரிவில் பொய் புகார் கொடுத்த மருமகள் மீது நடவடிக்கை எடுக்க கோர்ட்டு அனுமதி பெறப்படும் என்று போலீஸ் தரப்பில் தெரிவிக்கப்பட்டு உள்ளது.